URTE BI GURASOEN HERIOTZAREN ONDOTIK
Dagoeneko urte bi joan dira
gurasoak, bata bestearen ondotik,
hil zirenetik,
isiltasunean, iheska balihoa bezala
joan diren urte bien denbora,
luze, ahanzkor,
norbera ezerezean uzten duena
haize-zurrunbilo bortitz baten moduan.
Dagoeneko urte bi joan dira
eta zenbat joanen diren ez dakit,
nire bizitzaren luzean bezainbeste,
eta gure arreba nagusiaren
eta anaia gaztearen,
haiek baitira gure denboraren
alfa eta omega.
Dagoeneko urte bi joan dira
gure inguruko harresiak jausi eta
gurasoak hil zirenetik,
astiro, mazaltasunez,
ohi zuten moduan,
eta Jainkoari esker
lar minik gabe,
udazkeneko orbela doan bezala,
eta lagunek elkarri agur egiten
arratsalde gogoangarri bat
batera eman eta gero.
Dagoeneko urte bi joan dira
gurasoak hil zirenetik
eta bizitzari eusten diogunetik
heriotzaren kemenaz.
Los Angeles-en, 2001eko abuztuaren 24an.
© Andolin Eguzkitza