HARAT-HONAT

Hi, tzigano, entzün ezak

gilikeautüko deiat

Bidez bide, hebendik harat

honki jin hire etxerat

(Mixel Etxekopar. Ekialde)

Lur hauetara etorririk

badira sei mende bederen

hizkuntza bat kultura joria

musika dantzak koloreak

Ez gaixtoagoak ez hobeak

diferenteak eta pobreak

ijitoak buhameak

Manera bertsuan agotak

arraza madarikatua

berokarri eske eta goseak

nola leihotik sartzen den katua

Hainbertze etorri garenak

Denboraren poderioz

mamitzen joan den orea

hezur-haragizko ondarea

gure baitako izaera gordea

Mugalde lainotsu honetan

odola nahasia zainetan

Munduko leku guzietan

bizinahia begietan

Gaur goizean berean jo dute

kax-kax gure atean

errefuxiatuak, iheslariak

xalant arraildu batean

Eta lur hauetatik bertzeetara

hainbertze joan behar izan dutenak

Ez du atsedenik halabeharraren trenak

bihar ni ere eramaten ahal nauenak

Harat-honat, harat-honat

ibilki gara munduan jendea

nola mapetako marren gainetik

libre paseatzen den haizea