SOLDADU AHITUA

Oroitzen naiz

zure logelatik komunera

etxeko pasilloan barna

lubakitik lubakira

nola sumatzen zintudan

gauleheneko nire lo arinean

hankak herrestaka erdi sonanbulo

soldadu ahitua

sekula ixten ez ziren gure kuartoen

ate okertuen zirrituetatik

zeure gerra jauntzi hartan:

galtzontzillo zuri lasaiak

kamiseta ere zuri

“dena gezurra da”

urriki beranta

idatzia petxuan

tatuatua kopetan

“no future”

haren aitzindari

zure garrasi isila

Nolakoak ote ziren zure ametsak

izter meheko haragia zintzilikatzen hasia

zenbat alditan agertuko ote zitzaizkizun

Somosierra, Guadalajara, Girona