BIDASOAN (INBENTARIOA)

Armada inperialistetako zaldi ikaratuen

eta soldadu tirokatuen azken antsiak

Karlistadetako talde harrapariek

nahi zuten xurimentaren uharri azpietako gordelekua

Harrobian fusilatu zituztenen odol gorriarekin

mozkorturiko xintximariak

Kanilako urik gabeko baserriko

arropa garbitzailearen esku hormatuak

Ito hurran ibiliriko kontrabandistak

eta haiek ekarririko aziendak

Muga pasatzaileek engainatu eta abandonaturik

ito zirenen Europarako ametsak

Gerra gatazkek mehatxaturik ertz batera edo bertzera

ihesi joandakoen izialdurazko begirada erneak

Ur uherrera salto eginez biziari adio

erran zion dohakabearen hondarreko otoitza

Kuartelean torturaturiko gorpu puztuaren

gainean saltoka Endarlatsako izokina

Arrantzaleentzako bazka berri plastikozko

zikinkeria koloretsuaren desfilea

Haurrari erakusteko gurasoak ur azalean

txingoka dantzarazi duen harri xabalaren iduria

Lehenbiziko aldiz elkar ukitzeko josteta urdurian

sartu-atera dabiltzan neska-mutikoen gorputz biluziak

Kateak urratuz fantasia eroak bilaka murgil

urarekin batera joanean zu eta ni

Bidasoan...

Eta harrizko zubi

zaharraren arrailduan

basa-sagarra loretan