Espaloian dago munduaren xilkoa
Espaloian dago munduaren xilkoa
1989, poesia
102 orrialde
84-86766-15-X
azala: Ester Fernandez
Joakin Balentzia
1947, Iruņea
 
 

 

Hire helgabetasun deliziosa

(Broma I)

 

Hire helgabetasun deliziosa atsegin zeidan.

Hamasei edo hemezortzi urtetan diraun,

berdin zeidan.

Noizean behin horren kulpagatik

sufritu egin ditinat

neurrigabeko zalapartak, zentzurik gabe,

irudipen zorabiatuak, haurtzeloak ere.

 

Sorgin gaztetxo samarra haiz benetan,

baina hire barrea neskatxa fidakor batena dun,

egun askotako lorea, goizalde eguzkitsua;

hire gopurtz distiratsu, zabal eta freskua,

eta batez ere bizitzeko hire gura

oparo eta ikaragarriak

atsegin zeizkidan.

 

Orain dela gutxi, hau oinaze,

hogeitamar urte bete hituen

baina horrek ez din axolarik;

hilabetetako eta egunetako iraganbide

atxakigabeko eta monotonoa delako.

 

Hire odolan irakiten dinate

mundu irauli batek,

kolorezko ibaiek,

itsaso ilunbetsuek,

urratu gabeko lurrek,

mugatzeko mendi eta oihanek.

 

Maite haut adoleszente;

nahi ninduken emakume bihur hendin

hirurogei urte edo gehiago izanen hituelarik.

Hire helgabetasun deliziosa

gustatzen bait zait.