GOIZAREN EBOKAZIOA

Izarak ihintza bezala ume txikiaren gainean

bere bizitzako goizarekin

zelan ez egin metafora bat

oihuka, biraoka, bihur-bihur eginda

erditu zen ama bart

apirileko gauotan

Liriden euria da

Zuoren Kronikan aipatu zituzten jada

Lirida-izarrak, orain dela 2.700 urte

narras, katamar, oinez

burua aterata itsasoan

dabiltza ugaztunak munduan

eta ez dakit den loreen usaina

edo uretan islatutako

loreen usaina

eta ez dakit diren ama-semeen ahoak edo

leihoaren distiraz haraindi

zuhaitz guztietako txoriak.