Kea behelainopean bezala
Kea behelainopean bezala
1994, poesia
80 orrialde
84-86766-53-2
azala: J.M.W. Turner
Harkaitz Cano
1975, Lasarte
 
2023, poesia
2022, poesia
2018, nobela
2015, narrazioak
2011, nobela
2005, narrazioak
2001, poesia
1999, nobela
1996, nobela
 

 

Gereziak

 

Hemen ere lehen gereziak jaten genituen sarajevo

hemen ere lehen lau esku eta lau gerezi

zortzi amets eta hamasei urtetako neska bat baziren

eta keak gure oroimena zulatzen zuen

euriak quorumik gabeko egiten zituen arratsetan

baina gaur hamasei urtetako neska beltzaranak

galduak ditu hirugarren eta laugarren eskuak

berak zaintzen ditu gerezi banaka erauziak

gurasoen besoetatik sakailatu haurrak

bakoitzak bere anpoloia dauka bularrean

eta bular gaiztotuek ez diete parkean sokasaltoan

ibiltzen uzten kukutx eztula diote

harriek begirik ez ezta herriek ere

izotzaren maindireetan

herrena ez den herio baten zantzu ezabaezinak

Eta zer egiten zenuten ordu luze haietan

zakur trenkatuek ahausi egiten zuten bitartean?

galdetu zion urrunetik etorri

eta sekula gerezirik probatu ez zuen kazetariak

hamasei urtetako neska beltzaranari

 

—Abestu egiten genuen

 

eta bonbaketek eskailera naufragoak dardarazi gauetan

odol errekek tantaka baino areago langarrak lez

ateen petik zoko guztiak blaitzen zituzten gau horietan

txori eta adar hautsien zaratarik gabeko gauetan

arimaren zabortegietan igitaiez bidea irekiz

heriotzaren hesituretan uholdeek begiak kamustean

zer egiten zenuten infernuz gainezkatu gau horietan?

 

Neska beltzaranak lurrera begiratuko zuen

(harriek begirik ez

ezta herriek ere)

eta gero begi gorrituez zerumugara

umeren batek bere hatz inuzenteez gerezi urguriak

lehertarazi zituen treneko konsignan

galdera hura luzeegia zen luzeegiak sufrearen apetak

 

—Gau horietan oso ozen abesten genuen