—165—

Ibiñagabeitia'tar Andima'ri

1961-I-24

        Adiskide maitea,

        Ba da aspaldi ez dudala geiago zure berririk izaten; nere azkenengo eskutitzari ez zenion erantzun, uste dudanez. Zer moduz zabiltza? Ala gaxorik zaude edo egon zera azken dembora hontan? Ezetz naiago nuke, eta zure ixillune luzea alperraldi bati zor izatea.

        Dena dela ez dut illa hau igarotzera utzi nai zuri nere zorionik onenak Urte Berrirako opatu gabe. Agian 1961-garrenak pozkarri geixeago ekarriko ahal digu Euskaltzaleoi joan direnek baino! Ez dut hala ere itxaropen aundirik... Gure nausi diren bi jeneraltxoek traba ta eragozpen ugari jarriko baitigute noski, aurretik bezala, gure ethniaren alde borrokan diardugunoi. Noiz Ortzik gure otoitzak entzunen ditu??

        Gauza berririk guti hemengo Euskaldunen artean. Joan den Urrillan lau aste igaro nituen Zuberoan eta Gipuzkoan. Donostian gure adiskideak ikusi nituen: Arrue, Irigaray, Etxaide eta Mitxelena. Azken honek, dakikezun bezala, Euskal literaturaren historia bat idatzi ta argitara erazi berri du, erderaz, bainan oso baliosa, Madrileko Minotauro Argitaldaritzan. Etxaidek eleberri bati ekiten dio; pentsatzen dut haren Itsasoa laño dago ezagutzen duzula; haren euskera geroago eta obetuz dijoa ene iritziz.

        Baionan Aita Laffitte ikusi nuen. Herria-k ematen dion lanaz beste, hark ere euskal literaturaren historia labur bat egin gai du, Frantziako Que sais-je? bildumarako («Presses Universitaires de France»). Ez dakit ordea zertan duen haren egin-gai hori.

        Nik ez dut lan luzerik ondu. Artikulu zenbait, euskerazkoak Egan-erako, ta erderazkoak Elgar-rerako; bestalde poliziako ipuintxo bat, datorren Egan-en argitara emanen dutena. Neurtitzik ez dut aspaldi ontan idatzi. Goi-arnasa falta, nonbait.

        Jakin nai nuke ea Aur besoetakoa dela eta, zerbait lortu ahal izan duzunetz. Atsegin aundia nuke nere aur honek bein argia ikusiko ba lu; bainan dudan nago. Zer nai dela, eskerrik beroenak ematen dizkizut orain danik arazo hortzaz egin ta egingo duzun guztia gatik.

        Eta zuk euskerazko lanik egin ahal duzu? Zure Maita-bidea ez ahal dute sekula argitaratuko aldizkariren batean edo liburu-forman?? Euzko Gogoa-n idazten duzu noizik bein? Nik lan bat edo bi igorri nizkion Zaitegiri; ez ditu ordea publikatu, ez atzera bidali, ez eta neri idatzi ere. Beraz, ene lankidegoa gabe igaroko da aurrerantzean.

        Jendetasun gabeko beste notin bat, gure Miangolarra: noiz igorriko dizkit atzera ene 25 poemak? Askoren kopiak galdu ditut eta lehen baino lehen nai nituke, G. Arestik esan baitit hark eta lagun batek gogo dutela gure iruren poemen anthologia bat argitarazi. Eskatu diot Irigarayri Miangolarrari idatz diezaion —lagun omen baitirade biok— eni igortzeko; bainan orain ere ez dut deusik jaso. Etsita nago.

        Luzatu gabe idatziko didazulakotan nagoela, bukatzen dut hemen, zuri ene goraintzirik onenak emanaz, bai eta ene aitaren partez ere.

        ''' Jon Mirande.

        PS. Txomin Peillen Argeliatik sartu berri da. Euskaltzale geratu zaigu, zorionez. Ardura elkar ikusten dugu; beste euskaldunik ez dut tratatzen Parisen.