—127—

Ibiñagabeitia'tar Andima'ri

1958-I-7

        Adiskide maitea,

        Esker mila zure eskutitza ta karta gatik; guk ere Urte-berri on bat opa dizugu, zorion, osasun ta ontasunez betea eta agian, Europan zu ikusteko atsegiña izango dugu aurten...

        Zaitegi'ren berririk ez dut izan aspaldi onetan; Urte-berriko karta bat bidali diot bañan ez dit orain arte erantzun. Neronek ez nion ezer esan, E.G.'an «Zaldizka zeruan» argitara zuelakotz bañan Dominike Peillen'ek iduri erazi bide zion eskutitz batean, ez nintzela orrengatik oso konten eta, bear bada, gaitzituko zitzaion apaiz jaunari. Esan gabe doa ez diodala den gutxieneko aierkunderik argitaratze ori dela kausa, bañan daukat ez zuela orla jokatu bear...

        Gañera, uste dut aize txar batek bahatzen duela E.G. orren baranoan orain. Zaitegi'k diotsa etsaiak sortzen ari zaizkiola alde orotarik... Ez dakit egia den, bañan E.G.'ari eman dion itxurarekin, ez da andi Euskaldun askok, Euskaltzale askok ere, ez ba diote laguntza osoa eman nai. Ezin uka E.G. alderdi baten mezularia dela, (JEL zaleena) naiz ta Zaitegik berak esan zidan, Parisen alkar ikusi genuenean, edozein eritzitako Euskaldunei ateak zabalik utziko zizkiola. Ori ez da egia izan, ezen jeltzale batek bere iritziak oro aipa ditzake E.G.'an eta jeltzale ez denak, berriz, ateak zabalik utzi ba zaizkio ere, ezin detzake bere politikako edo erliginoko iritziak aipa. Bestalde, usain ezinago klerikala dario aldizkariari —beste euskal gazeta guztiai baño areago; eta lenago, Guatemalan agertzen zenean baño areago ere, uste dudanez, Europara eta, gure apaiz jauna Lafitte, Charritton eta beste olako ofiziokide batzuek artu ditu lankide urbillentzat. Bada, katoliko ala druida, asko aseta gaude klerikalismu orrekin.

Leturia'ren egunkari ezkutua irakurri dut nik ere eta asko gustatu zait. Gauza berria dugu or. Txillardegik eskeinia. Ala ere, ez dut gogo oso onez oarteman egilleak Frantziako kultura'ren aurrean darakusan begirune andiegia B. Nafarrokoek dioten legez kampoan lili, etxean lore ta frantzes etxe ontan bizi ba litz Txillardegi, ez luke bear bada ainbat miretsiko.

        Aspaldi ontan ez dut ezer ere idatzi euskeraz (ez eta erderaz ere...) . Ez dut geiago idazteko gogorik ez errextasunik; eta, gaiztoago dena, biziak ez du areago gozorik enetzat; damu dut artu dudan bideaz, bañan orain beranduegi da beste bat artzeko... fiat voluntas Deorum!

        Uzten zaitut, adiskide maite ori, gu iruren goraintzirik onenak zuri igorriz.

        Agur biotzeko bat zure

        ''' J. Mirande' rengandik.

        P.S. Eskerrik asko Miangolarra'ri esan duzuna gatik, bañan ikusten dukezunean, otoi, galdetu zaiozu poemak onera bidal dietzazkidan...

        P.S. 58-I-8

        Orain berton Urrestarazu'ren eskutitz bat artu dut eta artan esaten dit zure ama maitea Elantxoben zendu berri dela. Zigur izan zaite adiskide on ori, biotz-biotzetik parte hartzen dudala zure naigabe andian, ainbatez geiago non nerorren ama ere aspaldi dan ohean eri baitut, eta badakit zer biotzmin ematen dun amaren zorigaiztoak geure bati. Itxaropen daukat, ez bear orrek ez zaitula ala ere lurreratuko eta zure aide ta adiskide Euskaldunen parte artzeak ezin batean kontsolatuko zaitula.

        Ene gurasoek ere beren doluminak igortzen dizkizute biotzetik.

        J.M.