MARRETAN HUTSUNERIK EZ DA
senti ezazu mizpira eztarrian
eta zatoz suzko argien dantzalekura
senti ezazu zisjordania autobusean
birikak belarrietan lehertzean
senti ezazu hutsa begietan
zapatak busti zaizkizula
senti ezazu B-52ak eta newtonek
bidaltzen dizuten askatasuna
senti ezazu metalezko soka
hatzak odoltzen dizkizula
senti ezazu besoek ez dutela hegan egiten
burua hirugarrenetik espaloira botatzean
hotzikaran malda dakusat soilik
eta marretan hutsunerik ez da
© Hedoi Etxarte