- 1
- 2
- 3
- 4
OINAK
Etxerako bidean dago ia beti,
kalean norbait aurkitzen duenean.
ELFRIEDE JELINEK
Ibiltzeko moduagatik jakin liteke
bere buruarekin gustura doan bat.
Ibiltzeko moduagatik
zoriontsu izateko bokazio faltan da hori,
takoiak kentzean hutsean geratzen da hura,
ez du lurra sentitzen oinutsik datorren horrek.
Zu ere ibiltzeko moduagatik ezagutzen zaitut lepoz,
galderak irakurtzen dizkizut oinatzetan,
eta badakit ez zarela nigana etortzen ausartuko
bidean adieraziko zenidakeelako esan beharrekoa,
zure eta nire arteko bidean artez datorrena
aurrean paratu eta ez lidakeelako aitortuko
entzun nahi dudana, zure oin hotsek bezala
zure oin hotzek behin aitortu zidatena.
© Leire Bilbao
