Itsaso mutu bat margotu huen
Heure leihoak itogarri eder bat izan zezan
Itsaso ahantzi bat saskian biltzeko modukoa
Ateondorainoko isila heure bihotzaren eneak
Hezur erratuen abarrotsik gabe entzun ahal izateko
Oinazearen sakona malko mulkotan sinetsi nahirik
Ateondorainoko isila
Ezein untzi fantasmak atreka ez zezan heure ahoan
Bazter odolduen albiste
Heriotzaren zaldia
Lau hanketan zuria
Zazpi pausotan iragaiten du
Gure herriko zubia
Aspaldian agortu dituk itsaso haren iturri gezak
Eta konfesatu nahi baduk heure lerratzea
Zin dagit sinatzen dut ez nuen berehalakoan ikasi
Eskua egunero mozten
Ikasia behar hengoen hitzak ez lukeela hitzetan loratu behar
Poesia balizko erroten erresuma izanik ere
© Koldo Izagirre