—85—

JON MIRANDEri

Lutetia, 1952-X-10

        Adixkide maite:

        Igandeko ikustaldi goibelaren ondoren biotza zauriturik etxeratu nintzan. Beltzaldi beltzenaren mende, ondorengo egunetan egon naiz. Alare, goibel-giro orri garai egin bear niolata, zearo garaitu dut. Nik uste, zuk ere beltzaldi ilun ortatik ateratzeko aleginak eginen dituzula. Ez, ene adiskide! Zure lana ez da lan alperra, emankorra baizik. Zoritxarrez gure elerti-oboan, oraingoz beintzat, ez daukagu diru irabazterik, alare ezin dezakegu, al dugunok beintzat, gure izkera erio-egaletan utsera joaten utzi. Erioa ez da atsegina, aberri baten erioa aldiz mingotsagoa beste edozein baino. Ni etsi-etsita naukazu, zuk atera dezakezula euskera dagon narriotik, ortarako gai zaitudan ezkero. Beaz izan biotz eta adore!

        Atzo St. Germain de Prés-ko moldiztegi edo irarkola baten izan nintzan. Zure olerkiak zenbatean argitaratuko, irarriko obeto, lituketen galdetu nun. Mila ale, eun orrialdeko idaztiño baten, 150 mila liberan aterako zizkidala erantzun zidan. Ekoizpen apaina izango litzake, irudi gabe. Ango lan zenbait ikusi nitun ederki asko irarriak. Ez zitzaidan garestiegi iruditu. Gainera eskuz irarria litzate, beti ere linotipiz baino askoz ere dotoreago. Pirenetik araindian merkeago noski, bainan ez lukete ain txukun irarriko. Gaurtik diru ori bilatzera saiatuko naiz, aurten bertan zure liburutxoa argitaratzeko. Poema originalak baizik ez ditugu argitaratuko, itzulpenak beste noizbaiterako utziz.

        Krutwig aldizkariaz mintzo zitzaidan. Galdezka dabil nun argitaratuko. Ni atzo izan nintzan irarkolan, garestiegi izango litzake aldizkaria irartzea.

        Labaien jaunak goraintziak igortzen dizkitzu, baita Egañak ere. Ua ere zai daukagu noiz igorriko ditiogun zure olerkiak argitaratzeko. Beaz badakutsu, zure lanen egarriz daude Euzkadi guztian (sic). Labaienek gainera esaten dit galdutzat zeukan Lizardik idatzi antzerkia arkitu omen du: Ezkondu ezin zitekeen mutila. Zoragarria omen da eta itz-aurre batekin E.G-an argitaratuko omen du. Azken aldizkari onen berririk ez daukat. Zaitegik iragarri zidan banakoa ez da oraindik nere eskuetara iritxi.

        Egunen baten elkartu bear dugu zure olerkiak irakurtzeko, argitaratzekoak alegia. Datorren igandez, lengusuarekin bear dut ezingo naiz zuregana urbildu. Egun igortzen dizut Barandiaranen mitologia eta Villasantek igorritakoak. Baitare zure azken olerki zoragarriaren aldakia ere. Itz bat idatzi gabe utzi dut, ez bainun ulertzen. Zeorrek argi-idatzita igorriko al didazu itz ori nere aldakiak osa ditzadan.

        Bukatu ditut Maita-bidearen oarrak

        Ortzi izar ta elementa guziek zure biotza pizkortuko al dizute.

        Laztan bero bat.