—173—

JOKIN ZAITEGIri

Miarritzera

Caracas, 1958-IV-8

        Adiskide ona:

        Ama il zitzaidanean egin zenidan eskutitzari ez dut uste erantzun diodanik. Arrezkero E.-G.ren azken zenbaki mardula eskuetara zait. Eskerrik asko banako ortan nere amaren oroitzapenetan idatzi dituzun itzen alderako. Santatxu bezela il zan «Aitagurea» esanaz buru-argitasuna une batean ere galtzeke. Jainkoak dezala bere altzo ederrean. Ala ere amak nere biotzean utzi didan utsune aundia ez da errex beteko, ez orixe.

        Joranez irakurri dut E.-G. Zure Piloktete itzul-lanetan umotasunera iritxi dan gizon baten lan ederra irudi zait. Izkera aberatsa erabili arren, egundoko jario goxoa ezarri diozu oraingo itzulpen oni. Zer esanik ez, berez dala tragedi ontako gaia ere errexagoa, ala ere darabilzun euskerak darion ugaritasuna ta zailutasuna arrigarriak dira. Eztitan irakurri nuen. Eta nere zorionak Sopokel osorik euskal-antuxinean eman diguzulako. Lan ederra burutu duzu, ia noiz argitaratzen duzun osorik idazti bikain batean. Larrakotxearena ere ederki, zer esanik ez Otearen Menditarrak. Bikaina zenbakia eskeini diguzuna.

        Ni orain, politikan murgilduta ari naiz sortu dugun aldizkari berria dala merio, Irrintzi, alegia. Igorri nizun, ez dut uste ordea eskuetara zaizunik oraindio. Bigarren zenbakia ere argitaratu dugu Aberri Eguna ospatzeko. Adiskide bat eta ni gaituzu aldizkaritxo orren egile ta sortzaileak. Izkera gogorrez idatzita dator gure jendeak noiz edo noiz esnatzeko. Elburu argia da berea, Euzkadiren askatasun osoa, ez gabiltza ertainkeritan, eta espainiarrekiko artu eman guztiak zearo zapuzten ditugu. Ala ere Alderdiaren bidetik ibili nai dugu. Oraingo gure egoera galgarri onek etsipenera daramazki abertzale geienak, emen beintzat. Garaia dala derizkiot karraxi ozen bat jaurtitzeko eta gure bideari gogoz ekiteko. Gazteak alako zantzurik ematen ez, eta azkenean ere zarrok asi bear izan dugu lan ortan. Gertu gaude inguru-mari guztiak astintzeko Euzkadiren osasunerako izango baldin bada. Ezin obeto artu dute emengo euskotarrek Irrintzi zer esan ugari eman du eta egonezin aundia sortu du inguruetan. Ain zuzen ere egonezin orixe nai dugu gure auzi latzen inguruan, Euzkadiren askatasun-inguruan. Or ikusiko dugu zer nolako uzta biltzen dugun.

        Len ere esan nizun emen dauzkadala zuretzako txanpon batzu baina bi edo iru palta zaizkit mordo osoa antolatzeko, orien zai nago diruok zuri bialtzeko. Ilebete au etzait igaroko ori egiteke. Yakineko Baztarrikak ere idatzi zidan beren aldizkarirako laguntasuna eskatuz. Orri ere zerbait biali diogu. Dana merezi dute gazte adoretsuok. Nik ere zerbait idatzi nai nuke E.-G.rako, baina ez dakit zeri ekin. Liburu berrietaz ezin nezake ezer idatzi, ezpaiditut ezagutzen. Lengo batean idatzi nion Zeletari agertuko liraken guztiak bialtzeko eskatuz. Orduan kritika bideari ekingo diot. Orrez gainera lan sakon bat ondu nai nuke, len-bait-len, nere nagikeri au uxatzeko.

        Zure berrien zai nagoela jakin ezazu. Igorri bada alik arinen. Anartean ar ezazu ene euskal-agurrik kartsuena.

        Irakurri dut Orixek Yakinekoei zuzendu dien idazkia. Agur eta ondo izan.