—252—

JON MIRANDEri

Parisera

Caracas, 1967-V-18

        Adiskide maitea:

        Arako Agustin gorenaren inquietum est cor meum donec requiestat in te-n antzera, urduri dagoela, esan bear dizut, nere gogoa zure berrien zai. Egitan aspaldiko zure ixiltasun orrekin, guztiz nago artega, zerbait gertatu ote zaizulakoan, dela zere bizi-bidean, dela osasunean. Ez nuke nai ez eri, eztare atsekabez arki zindezen. Artega nago bestalde, neonek ez ote dizudan ziorik eman ixiltasun ortarako; ala balitz jakin ezazu ustekabez izan dela eta nai mendrenik gabe; ez naiz gai zozto[...] tipienik ere ezarteko gure adiskidantza zahar onetan tupust egiteko, ez o[...]xi. Jakin ezazu bada, emen daukazula zure betiko adiskide zahar au zuri laguntzeko beti gertu.

        Berri txarrak ukan ditut etxetik. Ene iloba Irune, oraindik neska gaztea, il berri da, lau urtez erialdi gogor bat igaro ondoren. Gurekin izan zen hemen bi urtebez, eta elbarria (paralisis) asi zitzaion oinetatik. Ondo etzebiltzala oartzen zitzaion eta zenbait osagileengana eraman genuen eritasuna geldi ta moztutzeko aleginak eginaz. New Yorkeko neurologo sonatu batengana ere eraman genuen, bainan alperrik dena. Lau urte elbarria soin guztiaz jabetzen joan zaio eta Maiatzaren 8an azken atsa eman zuen. Ni naigabetuta nago guziz, ilobatxo hori besteak oro baino maiteago nuelako; ain zen amultsua, ain zen xamurra. Errukarriak miraria espero zuen eta Lurdera nahi zuen, Ama Birjinak senda zezan, eta ene arrebak naikari guztiak egiten bai zizkion, arat eraman zuen, baina Ama Neskutsak entzungor egin zion zoritxarrez. Barka, adiskide, ene senitarteko ainbat berri kaxkar eman dizkitzudalako; norbaiteri uxtu bear ene biotza, eta zuri uxtu dizut.

        Igorri nizun Eman... 3-4 zenbakia, Gernikari opatua. Eztakit atsegin izan zaizunez... Neretzako ezta batere zenbaki betea... Zu bezelako idazle aundi baten arnasa palta du... Gainera euskeraz nik nahi baino gutxiago dakar. Emen ari gera datorren alea gertutzen... baina beldur naiz orainartekoak baino utsagoa ez ote den izango ale berri au.

        Etxanizen gutuna izan nuen zenbait egun lenago eta Agirre-saria Onaindiari eman diotela diost. Agi denez, Etxanizek ere bere liburua argitara berri sariketa ortara biali zuen, bainan eztiote sariztatu, eta naigabez dago, bada bere ustez Onaindiaren liburua baino baliotsuagoa omen da berea (nik oraindik eztut ikusi) eta mila dolar gutxigo... Nik eztut ezer igorri, eztut libururik agertu eta, gainera ziur egon bialdu banu ere, etzidatela talde ortakoek saririk emango begiko zakarra bezin maite naute-ta.

        Zer besterik? Atsekabez nagoela, aurten ere nere orrerako ibilaldia atzeratu bearrik arkitu dudalako ene burua. Zaldietan ere jokatzen dut diru poxi bat irabazteko, baina oraindik zaldiok eztidate bear bezalako ostikadarik eman. Zaldi alenak.

        Idatzi adiskide eta igor zure berri atseginak beti ere onartuak izango baitira. Goraintzi Peilleni, eta zuretzat ene besarkadarik gartsuena. Agindu beti ere zure adiskide.