—249—

SANTI ONAINDIAri

Larreara

Caracas, 1967-III-21

        Adiskide maitea:

        Badira egun batzuk gure liburuaren bost ale josi bakoak artu nituela eta atzo jaso neban apainki azaleztutako egalontziz etorrita. Milesker zure zintzotasun eta ardura aundiaren alderako. Kontuak sasoiz eta zeuk gura dukezunean egingo ditugu. Atsegin izan jat benetan azalez ain apainki josi eragin dozun alea be; baina uts txikitxu bat arkitu dautsat: azal apainaren barruan, nire uste laburrean, azal-bigunaren irudia eroan bear ebala deritxot alan ba osoago eta apainago geratuko zan da. Quiles jaunari eztakit zelan aztu jakon ziaztasun ori, osorik eta ondo azaleztatu liburu guztiak azal bigunaren ostoa gorde daroie ba batez be irudiz edo izki apainez jantzita baldin badator, gure liburuan lez. Dana dala ederto dagola deritxot, eta guztiz izan jat atsegin. Eta orain beste bost edo amar azalbako bialtzeko esango neuskizu, bapere barik geratu naz-ta. Jaitxo bat egingo dogu etxean, adiskide zintzo eta euskaltzale gartsuenen artean, gure liburuaren ateraldia ospatuteko; edari piskat, gozokitsu batzuk eta txanpain bonbiltxu bat. Ezta izango emen egin daroezen liburu-batioak baizen ospetsua, baina gure artean poz-unetxo bat igaroteko bestekoa bai beintzet.

        Tauerren gutuna izan neban lengo batean bialdu deutsagun gure liburuagatik eskerrak emonaz. Txundituta gelditu da egin dogun lan aundi eta ederragaz. Aita Iratzaderrek be idatzi eustan esanaz artu ebala zuk bialduta Lan Osoak. A be ikaratuta gelditu da gure lanagaz. Irakurri neban Etxanizek Argian dinona. Eztago txarto, baina igarri igarrian dago gainbegiratu arin bat besterik eztautsola emon gure libruari. Ezta arrigarria be. Eztakit artun ete dozun egalontziz bialdu neutsun Eman... gure aldizkaria. Laster agertuko da irugarren zenbakiabe eta bertan gure liburuaren kritikatxu bat azalduko da neuk eginda. Neuk egin ezik, nork egingo leuke? Ondo dakizu zeinen diran nagi eta alperrak gure idazleak kritikak egiteko, eta zeinen lukurrak gainera txalo bero batzuk inori joteko. Eta itaunetxu bat: bialdu ete zeuntson Basarriri aleren bat bere bordatxoan gure liburuaren kritikatxoren bat egin dagian? Merezi leuke ba.

        Laster datorkigu Aberri eguna eta egun orrekin zuri be garizuma ondoko atseden-aldia etorriko jatzu, ondo irabazia gainera. Niri barriz orrantza joateko eguna urbildu jat. Egia esan, eztakit zer egin. Eztaukat bapere gogorik emendik zirkinik egiteko; ego-Euzkadira joan al banei? Baina iparrean geldituteko? Eztot uste merezi dabenik. Txarrena zuen artean eztodala ezelako askatasunik ikusten, ez irar-gaietan ezta bestelako zeretan. Guzurra ta abarra besterik eztabil or gaindi, urrutietakoak etzipetzeko; Baina ni enabe atzipetzen, Fraga Iribarneren ateraldiak eta egintzak irakurri ditut; Parisko izparkari bati egin diona eta batez be katalandar jakitun ospetsu Corominasi egin dautsona. Or askatasuna? Bai zera be... or inpernua besterik eztago.

        Eta amaitutera noia lanean asteko ordua dot eta. Parkatu ain labur natortzulako; urrengoa luzezago.

        Artuixu erbestetu onen euskal-agurrik kartsuena eta Pazko Aberri-egun zoriontsu bat egin.