Lazunak azkazaletan
Lazunak azkazaletan
2021, poesia
104 orrialde
978-84-17051-66-2
Azaleko irudia: Malen Amenabar
Oihana Arana
2001, Eskoriatza
 
 

 

ERAIL ERRAILAK

 

 

Leireri

 

 

Astelehen goiza

egunkari giroa;

haizeak hegaldatu

eta atzetik korrika segi

eta      segi

eta                    segi

arren, lehenera ezin daitekeen

paper zimurtua.

            Egunkari desmuntatuak dira

            tren estazioak.

 

Titularrak esnifatzen dituzten

kapeludun intelektualoideak.

 

Agur etsien ondorio:

mahukaren barrenean

gordetako zapi zuriak.

 

Iskanbila trauskilen aurkako

isiltasunezko keinu;

kanpai zaporeko musuak.

 

Lainozko ametsei

harrizko bizipenak.

 

Larruzko besoak

haragizko maletei tiraka;

txaplata ajatuak

I love Paris-ka.

 

Turista izateko

leku asko daude;

okerrena erbestea.

 

Zergatik da

trenaren inguruan sortutako

irudi kadukatuen zerrenda

txatxu hau

metroaren aurkako

pintada bat baino

poetikoagoa?

 

Gertuegi daude

poesiaren eta erromantizismoaren sarrerak

kaleko entziklopedian.

 

Poesiak kalea behar du

            eta trenbideak ez dira poetikoak

            kaleak nahi ez dituenean.