EGIN ALA EZ

Batek daki, akaso hitzak

zor dizkiogu isiltasunari

edo hitzei isiltasunak

edo ez dakit.

Egurrezko zubi baten karraska

pausoaren pisua;

nahia eta ahala elkartzen diren puntua da askatasuna

mingainaren muinean minik ez.

Batek daki, akaso plazera

zor diogu minari

edo plazerari mina

edo ez dakit.

Basamortua behar dugu geure

belaze birjinak bainoago.

Sentitu behar dugu

lokatza eskuetan

harea zapatak betetzen.

Bideak basa behar du, bide izango bada.

Zubiaren karraskak beldurtzen duena

ez da inoiz zubiaren amaierara iritsiko

baina ausartak, agian, zubitik behera eroriko dira.

Batek daki.