LUIZIA

batzuek kontrara dioten arren

ez dakit nork esan lezakeen zerbait

zure arnasa itoari buruz

zure gatibutzaren taupots itsuei buruz

substantzia kimikoak besteratzen zaituen aldiro

barruan sortzen den egonezak aldenarazten zaitu

argiak betikotzen diren hemisferio haietara

ez dut zure bisaia ahanzturara egotziko

ez esan nondik datorren minaren luizi hori

non gordetzen den atsekabearen hondalea

ez esan

besarkadek betikotzen gaituzte