Abu Salammamm

            Inperioko kanta bat

Honelako poema bat idatziko nuke George V.a erregeak
Buckingham Jauregiren aurreko iturriari katigaturik izan banindu
eta eman izan balit nahi beste janari eta emakume.

Handia da George bosgarrena erregea,

                                 Iturri honi katigatu bainau;

Idi-hezurrekin eta ardoarekin elikatzen nau.

Handia da George bosgarrena erregea—

Haren jauregia marmol bezain zuria da,

Haren jauregiak laurogeita hamazortzi leiho ditu,

Haren jauregia herenetan ebakitako kubo bat bezalakoa da.

Berak hil du herensugea

                                         eta Andromeda izeneko dontzeila askatu.

Handia da George bosgarrena erregea;

Zeren haren armadako soldaduak andana baitira,

Haren armada mila eta berrogeita zortzi soldaduk osatua da,

                                    Denak jaka gorriekin ipurmasailen inguruan,

Eta aurpegi gorriak dituzte, adreiluak bezain.

Handia da Ingalaterrako erregea eta beldur handia diote denek,

Zeren katigatu bainau iturri honi;

Emakumez eta edariz hornitzen nau,

Handia da George bosgarrena erregea

                                        Eta dirdiratsua haren iturri hau.

Izurdeen gainean dabiltzan jainko gazteekin apaindurik dago

Eta haren ura zeta bezain zuria da,

Handia eta harroa haren iturria;

Eta haren gainean, eserita, Victoria erregina zena dugu,

Errege handiaren ama, uztaiko gona bat jantzita,

           Haurdun dagoen emakume bat balitz bezala.

Bizi bedi betikoz erregea!

Bizi bedi mila urtez erregea!

Printze ttipia ergela baita eta burugogorra;

Zirikatu eta izorratzen nau bere trufa eta makilekin,

Eta aginpidera heltzen denean

Beste norbait katigatuko du iturri honetan.

Eta orduan akabo nire loria

Akabo nire bozkarioa!