Poesia kaiera
Poesia kaiera
Ingeborg Bachmann
itzulpena: Nagore Tolosa
2015, poesia
64 orrialde
978-84-92468-75-1
Ingeborg Bachmann
1926-1973
 
 

 

Gerorako utzitako denbora

 

Sasoi latzagoak datoz.

Ostertzean agertuko da

hurrengo agindura arte utzitako denbora.

Aurki oinetakoak lotu beharko dituzu

eta txakurrak zingiretako etxoletara bueltan eraman.

Izan ere, hoztu egin baitira haizetan

arrainen tripa-barruak.

Argi motela egiten dute eskuzuriek.

Tankera hartu diozu behelaino pean:

ostertzean agertuko da

hurrengo agindura arte utzitako denbora.

 

Beste aldean, hondarretan sartu zaizu maitea,

haren ile izurtuan gora igo da,

hitza kendu dio,

isiltzeko agindu,

hilkorra iritzi dio,

eta agurrerako gertu egongo da,

besarkada bakoitzaren ostean.

 

Ez aldendu begirada.

Lotu oinetakoak.

Eraman bueltan txakurrak.

Jaurti arrainak itsasora.

Itzali eskuzuriak!

 

Sasoi latzagoak datoz.