Parisen bizi naiz
Parisen bizi naiz
2013, poesia
144 orrialde
978-84-92468-48-5
azala: Kepa Gonzalez
Koldo Izagirre
1953, Altza-Antxo
 
2016, narrazioak
2015, nobela
2011, nobela
2010, saiakera
2009, nobela
2006, poesia
2006, kantuak
2005, narrazioak
1998, nobela
1998, kronika
1997, poesia
1996, erreportaia
1995, kronika
1989, poesia
1987, ipuinak
 

 

BILBO

 

erre dugula gernika

irratian peredika

beraiek eta hitleranoek

egin dutena erdika

 

hegazkinak hor inguru

alarmek jo dute ulu

gernika ketan utzita orain

bilbo daukate helburu

 

kardenalaren kapela

aingeruen xaramela

zeruko armaz jantzia dator

ezpatadunen gaztela

 

odola eder sablean

areilza jauna salbean

intziri dagi haizeak minkor

indar handiko kablean

 

basoak dira ospeldu

lizar orriak orbeldu

mendian bizi zetorren ura

ibaizabalen moteldu

 

antxetak hodei grisetan

zazpi sudur anisetan

gure bizitzak bizigarri bat

eskatzen du anitzetan

 

amildegia gertura

burua ezin eskura

lau haizetara barreiatu zen

hiri honen hezurdura

 

tren barik dago atxuri

abando berriz urduri

isilik dator grebaren hotsa

bilbok ez maite neguri

 

errekaldean lizarra

hari begira izarra

mende honetan minbera dago

euskaldunaren bizkarra

 

enkarterriko burdina

errekaldeko turbina

lanez indarrez osatua da

bilbotarraren buztina

 

bikaina apaina liraina

historiaren iraina

bilbo hau bihurtua da bilbo

odolusteko izaina

 

baforeak datoz kaira

mundu osotik bizkaira

zutitzen diren otzanek dute

edertzen denon kondaira

 

zabala eta gazia

itsasoaren grazia

bide berritan abiatzea

nork dauka galarazia?