BARNE ERRIMAK
POETEN SINDIKATUAN

idazkari burkide hori

egundaino pankarta ostean desfilatu dugun arren

orain bestelako jokamoldeak behar direla

esan zenigun azken batzar nagusian

gauzak legez egin behar ditugula

eta ibili, espaloitik ibiltzea komeni zaigula

eguzki berritan omen gaudelako

hori ere esan zenuen

lankide baten hitzak manipulatuz

barka ezazu baina uste dut legez ibiltzea baino

ibiltzea dugula zinezko helmuga

eta ez goroldioa biltzea giltzurruneko harrietan

ulertzen didazu noski

mugarik gabeko bide egitea baldin bada xedea

gauzak bidez egin behar genituzkeela esanen nuke

legezkoa izan bailiteke, frogatuak gaude, bidegabea

halaber dakizu bidezkoa izan naizela beti

ez naizela inoiz izan ez legezko ez bulegozko

eta bidezko militante huts gisa

bidea betean hartzearen aldekoa naiz, betean

espaloi batetik besterainokoan

ulertzen didazu noski

mezu ozar bat hedatzearren zabaltasunez

mezu zabal bat ozartasunez

banuke arrazoiren bat edo beste

mister ford gorrotatzeko

frau mercedesek

egunero harrapatzen dit katxoa gurpilpean

ferrari jauntxoak, il signorinok

gurdia bide bazterreko putzuan azeleratuz

burutik behera laidoztatu ninduen atzo bertan

eta ez nintzen bakarra izan

komeni omen zaigunetik, alegia, espaloitik nindoala

garaiok eskatzen duten moldekoa izan nahi nuke nik zinez

horregatik idazten dizut gutun hauxe

idazkari burkide hori

uste dudalako eta piperrik inporta iritzi honetara

beste inor hurbiltzen ez bada nik badakit

behineneko landareak ez direla muskildu espaloietan

baizik zapatak hondatu izan ditugun erre bideetan

eta beraz, jakizu orain arte moduan eginen dudala bidera

elkar maite izan genuen izara margotu zaharrak

haizeberrituz

prosa zapaltzaile horren trafikoa trabatzeko

zuk agian ez ikusia egiten didazula espaloitik

baina zaude lasai idazkari burkide hori

ulertuko zaitut

sindikatutik bota nazatela eskatzen baduzu

zaude lasai

ukanen duzu epaiketa justurik