HAUTAKRITIKA BATERAKO
ZIRRIBORROA

izan ninteke larru latzeko lanbroa

izan ninteke labe hotzeko eguzkia

izan ninteke tristuran sartutako meatzaria

izan ninteke ahoa salduko ez duen prostituta

izan ninteke belearen mokorako kondarra

izan ninteke errurik ez daukan aitzakia

izan ninteke nire amak balekiko umezurtza

izan ninteke eskubiderik gabeko zoriontsua

izan ninteke apaingarrizko eztula

izan ninteke bietarik uztartzen ez den idia

izan ninteke lo galduko nagia

izan ninteke balezakeen elbarria

izan ninteke hanka bat saldutako bidekoa

izan ninteke bere neurriak hartzen ez dakien zurgina

izan ninteke ateri nahi ez lukeen bustia

izan ninteke goragoko gogorik ez daukan narrastia

izan ninteke behiek zer hausnartzen duten

                ez dakien harakina

izan ninteke zertara behartuko duzuen

                badakien managaitza

izan ninteke besterik behar ez duen eskekoa

izan ninteke eskeko herritarra

                izan nahi ez duen herritarra

izan ninteke erretzen ez duen ikazkina

izan ninteke uso pausoko gerlaria

izan ninteke handiagokoak ahantzitako zartatua

izan ninteke zer esanik ez dagoenean

                isiltzen ez dakien marmarra

izan ninteke hilobira kexatu gabe ezin duen ilintia

izan ninteke irratiak itzalitako musikaria

izan ninteke gurasoak alderdikoak ez zituen bizkaitarra

izan ninteke ardoa ematurik

                zauria sendatzen ez zaion oinazea

izan ninteke oinperatuak erruki dituen internauta

izan ninteke errukiak min ematen duela

                ikasia den burdina

izan ninteke perla baino perla barruko

                hondarra izan nahi duen alea

izan ninteke harri honek hartan edo hontan

                iraun dezan nahi ez duen olerkaria

izan ninteke aljeriarrari ez dela frantsesa

                esaten dion inozoa

izan ninteke sahararrari bera ere sahararra dela

                esaten dion sahatsa

izan ninteke irlandarra izan nahi ez lukeen abertzalea

izan ninteke

izan ninteke

izan ninteke hegan urgun dagien ameslaria

izan ninteke urrun bizi den etxekoia

izan ninteke erraz apurtzeko atalaga

izan ninteke iraultzailea izateko txipiegia den burgesa

izan ninteke musutrukeko maitalea

izan ninteke auzolotsa izaten duen auzotarra

izan ninteke pankarta ostean harrotzen ez den sumindua

izan ninteke kontzientzia onek ahanzten duten zera

izan ninteke ordu txikietako baikorra

izan ninteke enbor gainetik jaitsi nahi ez duen garaitua

izan ninteke bere hizkuntza maite duen totela

izan ninteke hotzarena kendu behar zaion igarlea

izan ninteke argia pizturik uzten duen eztabaidazalea

izan ninteke ohea irakurtzeko ere behar duen ezjakina

izan ninteke su oneko albistea

izan ninteke zure onera etorritako okerra

izan ninteke ikasi nahi ez duena dakien makilatua

izan ninteke gazitarako balio ez duen haragia

izan ninteke egun argitan galdutako sonanbulua

izan ninteke egunean eguneko zergaduna

izan ninteke egunero erortzen den mozorroa

izan ninteke beti ez dela egun izanen uste duen ezkorra

izan ninteke ikusi ala ez ikusiko kea

izan ninteke eguzkia noraezeko zapia

izan ninteke ametsetan lo hartzen ez duen liluratua

izan ninteke hankak zuritu gabeko iheslaria

izan ninteke aberastasun bakarra daukan konformista

izan ninteke new yorken izan ez den mundutarra

izan ninteke sakelan atlas bat daraman baserritarra

izan ninteke zaindu hadi esanen ez duen adiskidea

izan ninteke izarrak baino hondarrak

                ugariagoak direla uste duen idealista

izan ninteke bihotzak irteerak badituela

                uste duen mindua

izan ninteke linterna matxuratuak maite dituen filosofoa

izan ninteke dena suntsitutakoan zer edo zer

                azalduko dela uste duen zomorroa

izan ninteke

izan ninteke

izan ninteke ganbarara igo gabeko teilagina

izan ninteke bidezkoa oteko bitartekaria

izan ninteke ote arteko sasia

izan ninteke loreek larrututako laharra

izan ninteke bere neurriko zapata behar duen oinezkoa

izan ninteke tu egiten duen guztia

                karkaxa ez duen malderra

izan ninteke urkaberako balio ez duen haizea

izan ninteke burua geroko lepotik daukan salatua

izan ninteke ospel bereko zigortua

izan ninteke aldez aurretiko ezkerrekoa

izan ninteke euriari zein hodeitarik

                galdetzen ez dion bertakoa

izan ninteke apatridaren aberriko hauteslea

izan ninteke sardea satsetik atera ezinik ari den teorikoa

izan ninteke paperik behar ez duen hitza

izan ninteke ipuinez bete zuten kalabaza

izan ninteke isiltzen dudan zerbait

izan ninteke epelean hoztutako gizonezkoa

izan ninteke urrea urruneko bilatzailea

izan ninteke odola ultzeratik doakion emailea

izan ninteke erromako zubitik doan itzaina

izan ninteke vietnamita bat

                ohean gordea daukan mutilzaharra

izan ninteke lehenik egin eta gero

                ezpentsatu egiten duen zuhurra

izan ninteke kolkoa bete asuneko sendalaria

izan ninteke jo beharreko atean

                ikaratu egiten den mezularia

izan ninteke laurdenak oso dituen zatikatua

izan ninteke breizen breiztarrak nagusi

                kantatzen duen marrantatua

izan ninteke inoren muina

                hurrupatu nahi ez duen iritziduna

izan ninteke izotz ondoko eguzkia ahula zaion izerditua

izan ninteke izerdia sekretuz betea dela

                entzun duen forjaria

izan ninteke haizeari oldartzen zaion hostoa

izan ninteke bere malenkoniaren gauza badakien sentibera

izan ninteke bere ahotik jan behar duen mutua

izan ninteke halabeharrak huts egindakoa

izan ninteke saihetseko elorria ezin kenduko hedonista

izan ninteke askoren antzeko berezia

izan ninteke

izan ninteke

izan ninteke euliak ostiko emandako usteduna

izan ninteke egiak sinesten ez dituen galdetzailea

izan ninteke beste belarritik jalgitako esana

izan ninteke hitzak galdutako leiala

izan ninteke gatz erdiko kamikazea

izan ninteke bere bizitza aldatu ezinik

                gizartea aldatu nahi lukeen hilotza

izan ninteke uhartez uharteko uhina

izan ninteke komunztadura arazo hau

                demokraziak ekarri dion gramatikaria

izan ninteke ontzia betea delako edatailea

izan ninteke lantegietako esklaboekin batera

                jaikiko den bulegaria

izan ninteke ibaietara nahi ez duen ontzia

izan ninteke bere mugatasunean

                zorioneko bizi den anonimoa

izan ninteke basoa itsaso eta itsasoa baso

                bihurtuko dela oroitzen den irakurlea

izan ninteke hamaika euskal herrietarik zein den

                zinezkoa ez dakien antropologoa

izan ninteke non bizi den esan ezin duen maizterra

izan ninteke ozarrez nahasiko arrazoia

izan ninteke ausiki egiten ez dakien auzikaria

izan ninteke kendutakoan mina daukan harrobia

izan ninteke borroka bat galduta gerra osoa

                galtzen hasten dela uste duen sindikalista

izan ninteke gustuko ordokirik ez daukan ibiltaria

izan ninteke harriak bakean uzteko eskubidea daukala

                esaten dizuen legeostekoa

izan ninteke motzondoa moztera ez datorren azkarra

izan ninteke makurra makurtuko ez duen motela

izan ninteke dena gezurreko kontalaria

izan ninteke gazterik zahartu ez zuten hezia

izan ninteke isilik dakien eta hizketan dakien lekukoa

izan ninteke aldi galduak ardura ez dion presatua

izan ninteke larrua oso ez daukan heldua

izan ninteke amak musu kopetan emandako haurra

izan ninteke behaztopatzen ez duen harria

izan ninteke lur santurik aitortzen ez duen erromesa

izan ninteke artean onik ezineko dohakabea

izan ninteke etorkizunak bidea ez dakiela

                dakien kantoniera

izan ninteke kamera geldoan ikusi nuen

                besarkada hartako etxeratua

izan ninteke oiloluma eskuan hartuko ez duen idazlea

izan ninteke

izan ninteke

izan ninteke igitaia garitan probatzen ez duen jornalaria

izan ninteke bidebieta eta ategorrieta artean

                ibilitako zalantzatia

izan ninteke arrapostu askoren galdera asmatzeko

                gauza ez den entzulea

izan ninteke loreak ardia jan lezakeela

                jan lezakeen printzea

izan ninteke oraingoan hautsi eta

                hurrengoan jausiko den hauskorra

izan ninteke otoitza baino ortotsa nahiago duen abadea

izan ninteke galduz iristen den mandataria

izan ninteke sortu bako uretan bustitako gabarraria

izan ninteke ukabilak sakeletan gordetzen dituen

                mendekatzailea

izan ninteke ezinik badaukan eskuduna

izan ninteke harramazka egiten duen portzelanazko katua

izan ninteke zurian beltzeko petrala

izan ninteke harian ezagun den zauria

izan ninteke azpikontratako garuna

izan ninteke iturengo arrotza

izan ninteke bere gaiztotik aterako ez duzuen onbera

izan ninteke eskaileretan behera

                itsasora iritsi den menditarra

izan ninteke taupadak pausoekin

                batera doazkion abokatua

izan ninteke orbela trena geldiarazten ikusi duen gidaria

izan ninteke urak eramandako hitzak

                aterpetzen dituen errota

izan ninteke dantzan ez dakien zuberotarra

izan ninteke lanari lotua

                gauaren sorgina luzatzen duen zulatzailea

izan ninteke zozo batek kantari jartzen duen zozoa

izan ninteke harrizkoa ez den orri bateko izena

izan ninteke auzoko ezkila ere entzuten duen bakartia

izan ninteke berriz damutuko zaidan asaldatua

izan ninteke esaten duena guztiz sinesten ez duen egiatia

izan ninteke leihotik euromisilak

                festan ikusten dituen beduinoa

izan ninteke hodeietaraino hazitako

                zuhaitzik ikusi ez duen basozaina

izan ninteke jator askoa edo harjoa

izan ninteke bezperako ogia ere jaten duen soldatapekoa

izan ninteke zer emana ematen duen behartsua

izan ninteke onenak emanen ez dituen doilorra

izan ninteke prentsako argazkitan bakarrik

                azaldutako askoren laguna

izan ninteke

izan ninteke

izan ninteke ikusi batean ikusten ez den nabarmena

izan ninteke oraingoak oraingo pazientziaduna

izan ninteke ogirik ezean artorik nahi ez duen posibilista

izan ninteke gose grebarik egin gabeko morroilopekoa

izan ninteke txoroen atsegineko maisua

izan ninteke kea garra baino

                gorago nahi ez lukeen harroa

izan ninteke aditz guztiak jokatzen ez dituen alfabetatua

izan ninteke hemen ez banengoko hauxe bera

izan ninteke dena baino denagoa den zatia

izan ninteke uhinen araberakoa nahi ez duen hondartza

izan ninteke itsura hobekoa

izan ninteke dekoratua hobetu nahi izan duen xaloa

izan ninteke zakurraren putza esaten duen hiritarra

izan ninteke heste laburreko jatuna

izan ninteke zerutiarrak ez diren

                gorputzak maite dituen metafisikoa

izan ninteke bere aburuarekin

                zakarrizketan diharduen haizea

izan ninteke gauza ez izateko gauza

izan ninteke babak eltzean sartzen dituen ergela

izan ninteke zaborretan bilatzen duen kimikari lirikoa

izan ninteke politikari irtenbideren bat

                bilatzen dion zaborketaria

izan ninteke ez bururik ez buztinik daukan ikustekoa

izan ninteke buru bat eskas duen lepoa

izan ninteke preziorik gabeko ondasunen tratularia

izan ninteke mirua zuritzen duen ekonomialaria

izan ninteke hitzak janzteko ez dagoen kritikaria

izan ninteke ezbeharrean sortutakoa

izan ninteke behakoa beste nonbait daukan zelataria

izan ninteke zer ikusia egiten duen ezaguna

izan ninteke gibela behar duen aurrerazalea

izan ninteke balantza aldera erortzen ez den egoskorra

izan ninteke uzten didazuenerainoko zabala

izan ninteke ahal duen neurriko adostezina

izan ninteke besterik ez dakielako halakoxea

izan ninteke ni hau edo hura naiz

                esaten ausartzen ez den poeta

izan ninteke barrugorritan egindako aitortza

ez daukat beste aukerarik

izan nintekeen hauteslea naiz