MORFINA

Gogoratzen dut

morfina dosiak ez ziola oinazea baretzen,

eta bigarren bat eman geniola,

eta hala ere

zainetan zebilkion laztan kimikoak

ez ziola bakerik ematen.

Gogoratzen dut

errealitatearekiko kontaktu guztia galdu zuela,

urruneko lekuez berbetan hasi zela,

astiro, ezpainen kontrol barik,

niri begira,

baina ni ikusi gabe,

eta bere esku hezurtsua

nirearen gainean olgetan ibili zela.

Gogoratzen dut

hirugarren dosia emateko

zalantzan ibili ginela;

eta orduan

seko gelditu zitzaion

bihotza.

Gogoratzen dut

azken minutu haietan

gustura asko eskertuko zukeela

baso bete ardo

hurbildu banio

ezpainetara.

Gogoratzen dut

ez nuela egin.