10. BARKATZEN DIZUEGU

(maitek bi edalontzi prestatu ditu pontxearekin. intzari eskaintzen dio bat.)

maite: Nik barkatzen dizut globoa haustea eta horrela jarri izana egun berezi honetan...

intza: Eta nik barkatzen dizut zaplazteko bat garaiz ez eman izana.

(maitek zaplazteko bat emateko imintzioa egiten du. intzak geldiarazten du.)

intza: Lehen esan nahi nuen, lehen...

maite: Nik barkatzen dizut gauzak etengabe lekuz aldatzea.

intza: Nik barkatzen dizut gure artean hutsune bat gertatzen denean loctitea zu izatea. Barkatzen dizut zu ezerekin ez asaldatzea.

maite: Nik barkatzen dizut udan karabanan joatea beste batzuekin bidaian. Barkatzen dizut, bikotekidearekin uzten duzun aldiro, landetxe batera joan nahi izatea gurekin.

intza: Barkatzen dizut nekea, seinalerik eman gabe seinaleak emateari uztea…

maite: Eman, eman lasai, hori ez da barkatzen...

(intzak maiteri zaplazteko bat ematen dio.)

maite: Barkatzen dizut naturaltasuna, ni baino graziosagoa izatea.

intza: Barkatzen dizut nire antza eduki nahi izatea. Barkatzen dizuet zuei ere gure antza izan nahi izatea. Eta barkatzen dizuegu zuen antza ez duen beste inoren laguna ez izatea.

maite: Dena barkatzen dizuegu: erosotasuna, pribilegioa…

intza: Barkatzen dizut niri aurpegi txarra jarri eta besteekin la amiga la maja izatea.

maite: Nik barkatzen dizut begiak guztiz ez ixtea, ertzetik begiratzen egotea, beti gugandik zerbait jasotzeko zain egotea.

intza: Barkatzen dizut berriz ere pijama bat erregalatzea.

maite: Guk barkatzen dizuegu ospakizunera pijaman etorri ez izana. Barkatzen dizuegu laguntasuna sinpleagoa dela pentsatu izana noizbait. Barkatzen dizuegu momentu honetan, zuen lagunengan pentsatzen egotea gugan beharrean...

intza: Barkatzen dizuegu, noski. Barkatzen dizuegu zuen lagunekin aspertzen bazarete, edo ez bazarete hor egon, edo lagun berriak egin nahi badituzue… Aizu, Maite: (Ilaran dauden zutoinetatik erdikoa askatzen du, sarrera bat zabaltzen ariko balitz bezala) Barkatzen dizut laguntasunaren kontzeptua zabaldu nahi izatea…

maite: Eta nik eskertzen dizut rolloa segitzea. Benetan, eskertzen dizuegu rolloa segitzea. Lagunak?

intza / maite: Bat, bi eta hiru!

(Eskuan txu egiten dute eta publikoari eskaini. Iluntasuna.)