LEKUKOAK

Gauez berandu etzaten dira

    Gizon gazteak ohean,

Burukoek ez dituzte aisatzen

    Buru artegak,

Beren patua erabakiko duen zozketa

    Bihar egingo da,

Norberak abiatu beharra du eta arrisku

    Eta oinazeari aurre egin.

Neroni ote? Neroni ote?

Bihotzean begiratu eta ikusi:

    Hor dago erantzuna.

Bihotzak malabari

    Edo dantzari argi antzera

Eskujoko bitxi anitzez

    Engainatzen zaitu,

Eta zioak polizonteen gisa

    Beranduegi aurkitzen dira.

Zer eginen du, bere bihotzak

    abiatzea aukeratu badu?

Bihotza laztu ahala

    Lasaitasuna galduko du,

Bekaitz izanen die txori astunei

    Etxean, lorategietan,

Ibili behar baitu

    Premiabako arriskutik

Segurtasun amaigaberako

    Bide huts eta berekoia.

Salbatuko ote da eta itzuli

    soinua bere lurraldera?

Hodei eta lehoiak

    Aurrean ditu zutik, lanjeros,

Eta ametsen herra.

    Beraz utzi lauda gaitzan,

Ahalke izan ez dadin

    Krisiaren orduan,

Herdoilaren bailaran

    Zartatuko zaio distira.

Nor zara zu, zeinen mintzoa

    entzuten baita urrunegi?

Zu hiria zara eta gu erlojua.

Gu malkortegiko atearen zaindariak gara,

    Biak.

Ezker-eskubi,

Gau eta egun,

    Zelatan zaitugu.

Gure hitza desobeditu dutenei gertatutakoa

Ez galdetzea zuhurrago litzateke;

    Horiendako

Gu zurrunbiloa ginen, gu haitzondoa,

Gu lokamuts formala, tristura

    Eta zoritxarreko arrosa.

Igo mastan gora, ikasi marinelaren hitzak

Txoriez zamaturik irletatik datozen untziak

    Porturatzean;

Kontatu arrantza eta beste gizonei buruzko istorioak,

Bizitza gatibuen amets zabalak,

    Ostatu argituan.

Baina ez uste ez dakigunik,

Edo axoleza itxuraz gordetako hori so batez aurkituko

    Ez genukeenik

Ez dugu ezer egin, ez diogu ezer,

Baina ez erratu hilik gaudelako ustez;

    Ez nezakeen dantza egin.

Erorialdia izan dezakezulakoz gaituzu kezkan;

Ordutan izan gaituzu zelatan lorategiko

    Hormatik;

Zerua iluntzen ari da izpila bezala;

Zerbait erortzear da euria bezala,

    Eta ez dira loreak izanen.

Betazalen antzera zelai berdeak irekitzean,

Estaltzea hobe zena errebelatuz—

    Atsekabea:

Eta begira, zure atzean zaratarik gabean,

Oihanak hazten eta hedatzen ari dira

    Kreszendo hilkorrean.

Maratila bere sarrailan ari da irristatzen;

Leihoz kanpo mudantzetako furgoi

    Beltza

Eta orain bapateko larritasun azkarrez

Kaputxadun emakumea dator, zirujano konkorduna

    Eta Guraiza Gizona.

Edozein egunetan gerta daiteke;

Kasu, beraz, esan eta egiten

    Duzunarekin,

Izan garbi, izan apain, olioztatu sarraila,

Jorratu ortua, eman giltza erlojuari;

    Gogoratu Biak.