Bildumaren zerrendara itzuli

  LEHENENGO EKITALDIA   BIGARREN EKITALDIA   HIRUGARREN EKITALDIA

 

 

Hirugarren eszena

 

Zalaparta handia eta oihuak entzuten dira. Jendea zalapartan doa oraindik besarkatuta dauden NAGUSIA eta AGATHErenganantz; jendartean, AGATHEren ama azpikogonarekin eta poliziako komisario bat.

 

KOMISARIOA: Jaun-andreok, ixo! Okerra agirikoa da! Gizona saltsaren erdian harrapatua izan da. Nik dakidanez, aristokrata da eta gizon jatorra. Okerra bere borondatez konpontzea espero dut legeak horretara behartu baino lehen.

JACQUES: Jainko maitea, Jauna, harrapatu egin zaituzte.

KOMISARIOA (ALABA jo nahi duen AMAri gogor eutsiz): Uztazu. Dena konponduko da ahalik eta ondoen...

AGATHEREN AMA (JACQUESen NAGUSIAri): Itxura jator horrekin, zeinek esan kapaza izango zinenik...

KOMISARIOA (bienbitartean zutitu egin den JACQUESen NAGUSIAri): Jarraituidazu, Jauna.

NAGUSIA: Nora eraman asmo nauzu?

KOMISARIOA (NAGUSIA daramala): Gartzelara.

JACQUES (ahozabalik): Gartzelara?

NAGUSIA (JACQUESi). Bai, Jacques maitea, gartzelara... (KOMISARIOA urrundu egiten da. Osatu den taldetxoa desagertu egiten da. NAGUSIA bakarrik geratzen da oholtzan. SAINT-OUEN beregana doa bizi.)

SAINT-OUEN: Lagun, ene laguna! Iguingarria da! Zu, gartzelan! Nolatan ordea? Agatheren etxean izan naiz; bere gurasoek ez zidaten hitzegin ere egin nahi; badakite nire lagun bakarra zarela eta beren zoritxarraren erruduna izatea leporatu didate. Agathek ia atera dizkit begiak. Ulertuko duzu ziurrenera...

NAGUSIA: Baina, Saint-Ouen, zure esku dago ni saltsa hontatik ateratzea.

SAINT-OUEN: Nola?

NAGUSIA: Nola? Gauzak diren bezala esanda.

SAINT-OUEN: Bai, mehatxu egin diot horrekin Agatheri. Baina ezin dut egin. Pentsa ezazu ze itxura emango genukeen... Gainera, zure errua da!

NAGUSIA: Nire errua?

SAINT-OUEN: Bai, zure errua. Nik esandako zikinkeriatxoa onartu izan bazenu, Agathe bi gizonekin harrapatuko zuten eta guzti hau txantxan amaituko zen. Baina oso zeurekoia izan zara, lagun! Bakarrik gozatu nahi zenuen!

NAGUSIA: Saint-Ouen!

SAINT-OUEN: Hala da, lagun. Zeurekoikeriaren zigorra da hori.

NAGUSIA (gaitzetsiz): Lagun!

 

SAINT-OUENek buelta eman eta irten egiten da azkar.

 

JACQUES (NAGUSIAri oihuka): Jainkoaren izenean! Noiz utziko diozu lagun deitzeari? Guztien begibistakoa da berak tranpa jarri eta salatu zaituela, baina zu itsua izango zara beti! Eta ni, denen barregarri, nire nagusia ergela delako!

 

 

© Milan Kundera

© itzulpenarena: Beatriz Zabalondo / J.L. Aranguren «Txiliku»

 

 

www.susa-literatura.eus