Poema antologia
Poema antologia
Vladimir Maiakovski
itzulpena: Koldo Izagirre
1993, poesia
282 orrialde
84-86766-51-6
Vladimir Maiakovski
1893-1930
 
 

ZERTAZ? - HONETAZ?

 

Mila eta milaka ahotsek kantatutako

gai

pertsonal

etxeko honetaz

itzulika ibili naiz, urtxintxa poetikoa,

eta berriro itzuli nahi dut.

Gai hau

orain

otoitza da Buda-renean,

bere jabeen aurka zorrozten du beltzaren aiztoa.

Marten

bihoztunik balego,

bera ere

orain bertan

karraska ari da

honegatik.

Gai honek

galtzarbetik hartu

eta agintzen dio mainguari:

- Idatz ezak!

Eta elbarriak

papera utzi

eta orru egiten du,

baina kantu baten hariak eguzkitan dirdai.

Badator gai hau

jotzen du sukaldeko atean

jiratzen da

desegiten da ontto baten txapela bezala

eta erraldoiak

gogor egiten du segundu batean,

gero suntsitu

eta ihes egiten du

gutunen zirriborropean.

Badator gaia,

eta agintzen du:

- Egia!

Badator gai hau,

eta agintzen du:

- Ederra!

Eta

eskuak gurutzean josiak izanda ere

bals bat xuxurlatuko zenuke handik.

Gai honek alfabeta jotzen badu

ez dago liburu errazagorik!

A

Kazbek mendia baino pikoagoa

bilakatzen da.

Zoratu egiten du

ogia eta loa galarazten dizkizu.

Badator gai hau,

ahitezina,

eta dio:

- Niri baino ez beha!

behatzen diozu

eta badoa, banderadun,

zeta gorriko su bat lurrean zabalduz.

Gai maltzurra da!

Gertakarien hondoetara egiten du murgil

instintoen zokondoetarik jauzi egiteko prest

eta haserre

- ahantz ezazu! -

arimak

astindu eta bere larrutik ateratzen ditu.

Gai honek harrapatu egin nau bere suminduran,

aginduz:

- Niretzat

egunen bridak!

Imintzioz ikuskatu du egunkaria

eta ekaitz batean sakabanatu ditu

aferak eta jendeak.

Gai hau sortu da

beste guztiak ezabatuz

eta bakarrik

ondoan gelditu zait partaiderik gabe.

Gai honek labana eztarrian paratzen dit.

Mailuketa hau!

Bihotzetik bururaino.

Gai honek eguna ilundu eta agindu du

ito ilunpe horiek bertsoen kopetaz,

jo danborrak bezala.

Gai

honen

izena

.........!