FESTA UTZI

Eginahalak egin: ez atera erretratuetan.

Beste erremediorik ez balego,

jarri atzeneko ilaran.

Beste erremediorik ez balego,

haizena baino zaharrago

atera hazala beti argazkilariak.

Beha horri: doan denbora ez duk doakoa

—dohakabea, agian—.

Jakin galleta kutxetako heure argazkiak

besteentzako altxorrak direla beti; ez heuretzat.

Beha amuari, beha begiari:

bi-biak dituk gauza bera.

Beha odol arrastoari:

heure begia dateke hurrengoan amuko

—heure heste-korapiloa damuko—.

Beha, ez ahaztu: zoriona duk mendekurik onena.

Depresioaren zakur beltzari erran,

begi beltzetara so:

“Enteratu hadi, perrua,

beltzagoak dituk ene begi perruak”.

Eskua laztantzen jarraitu agurrekoan, otoi,

sekula heure oherik nahiko ez dugun emakumeoi.

Ez uko egin festei

jai-ugazabarekin muzindu haizelako soilik.

Beha, ez ahaztu. Izan eskuzabal:

ez hadila sekula festa uzten azkena izan.