BAZKALOSTEAN

suma ditzaket

gure inguruan ibiltzen,

tarteka ile-kordetan,

aldika eskuari koska egiten.

Ikus ditzaket ohea inguratzen

aulkien hutsuneen artean jostari,

manta pisutsu baten gisan

gorputzak geldiarazten.

Barnera begira

kanpokoa ulertzeko eginahalean,

kontu handiz esnarazten ditugu

hauts usaineko berbak.

Senti ditzaket

hosto umel artean

arnasa berreskuratzeko orduan,

so dauzkagun askari-loreak nola,

udazken argiko errezelak gordeta.