GERTAERA SINPLEAK

Ekialdeko estrata jendetsuan,

non andreak balkoietan dantzatzen diren

esku gazteen txaloei jarraika,

irudimenerako materiala eskaintzen didazu,

kontakizun berrietarako akzioak.

Garai bateko estrata iguala izanagatik

eraikinetako itzalen formak aldatu dira,

beste berba batzuek deskribatzen dituzte

orain elkar ukitzen duten figuren eiteak.

Kanpo-behatzaile soil bilakatuta

irri konplizeak aztertzen dihardut

xehetasun oro neureganatu guran.

Keinu sinpleenak ere zailak izan daitezke azaltzen,

esaterako aurreko guztia

idazteko nahiaren zergatia:

zer dela eta eszena hau eta ez beste bat?