AHAL IZANEZ GERO

Nik ere abestu nahiko nioke

humoreen eraztunari

esadan zer sentitzen dudan,

eskuak dardarka

jartzen dizkidan sentsazioa

deszifratu ahal izateko.

Galdetu nahiko nioke ea

presio atmosferikoak eta ilargi aroek

egiatan baldintzatzen duten

begiratzeko modu zehatzegi hau,

dantzari bizitzeko gurari basa.

Ahots honen hondakinak

ukitu arte kantatu nahiko nuke,

isilarazitako oro

lurreratu ahal izateko nolabait.