Gu gabe ere
Gu gabe ere
2021, poesia
96 orrialde
978-84-17051-79-2
Azaleko irudia: Nagore Legarreta
Itziar Ugarte Irizar
1995, Oņati
 
 

 

HEGOAK

 

 

Beste igande bat gaur

zure ondora natorren gehienetan nola.

 

Seiak dira, gaua da.

 

Telebistaren aurrean

barruan ere erdi ilunpetan gaude,

alboz alboko butaka banatan.

 

Zeharka begira,

aurreko igandean utzitako lekuan dirudizu:

jertse polar gorria goraino igota, eskuak

manta gainean eta manta toles berberekin.

 

Ez gaude bakarrik

—sukaldeko argi urdinxkak diosku—

baina egongo bagina bezala da.

 

Orduan esan duzu:

Hegorik ez dugulako, bestela…

 

—arratoiak korrika bi solairuen artean—.

 

Esatear egon naiz

zurea ez dela bizirik egoteko modua.

 

Baina isilik eutsi diot. Keinu txiki bat

egin didazun arte, esanez bezala,

ikusiko duzu, ume, ikusiko duzu…