Keinu konplizeak
Keinu konplizeak
2018, poesia
88 orrialde
978-84-17051-12-9
azaleko irudia: Kepa Gonzalez
egilearen argazkia: Dani Blanco
Karlos Cid Abasolo
1963, Madril
 
 

 

INTERTESTUALITATEA

 

 

Pretty Woman

defendituko dut.

Haren gaitzesleen kontra,

sikatearen kontra,

lukurreriaren kontra,

justiziaren kontra,

defenditu

eginen dut

Pretty Woman.

Galduko ditut

aziendak,

soloak,

pinudiak;

galduko ditut

korrituak,

errentak,

interesak,

baina Pretty Woman defendituko dut.

(H)armak kenduko dizkidate,

eta eskuarekin defendituko dut

Pretty Woman;

eskuak ebakiko dizkidate,

eta besoarekin defendituko dut

Pretty Woman;

besorik gabe,

sorbald(ar)ik gabe,

bularrik gabe

utziko naute,

eta arimarekin defendituko dut

Pretty Woman.

Ni hilen naiz,

nire arima galduko da,

nire askazia galduko da,

baina Pretty Womanek

iraunen du

zutik.