FUTBOLAREN ONURA POETIKOA

Bi mahai

New Yorkeko Euskal Etxeko

egongela dotorean.

Batean agure bat,

Amorebietakoa (noski),

Sagar Handian hirurogeitaka urte daramatzana,

bertako peña txuri-urdin edo zuri-gorriaren

(aukeran)

Gabonetako loteriaren diru-saria banatzen.

Bestean,

poeta eta editorea,

nor baino nor,

poetaren lana

adostasun magikoaren bidez

duindu guran.

Badatoz saldoka

loteria-saria kobratu nahi dutenak,

aurrena agurearengana,

baina gero beste mahaira,

nor bere iritzia ematera,

hor metonimia bat sartuko nuke,

horko litoteari ez deritzot egoki,

azken bertso-lerro horren aliterazioari ez diot

zentzu handirik ikusten.

Hori bai omenaldia

beren euskal arbaso nekazariei

auzolan xume horren bidez

egindakoa.