Ile orratzak eta gomazko xingolak

Irakaspenez beterik iragan urte guztietan, krait sugeak

bezala kendu ditut gainetik azal zelula hilak, eta,

azkenik, loturarik zaharrenean aurkitu dut

legitimitaterik erakargarriena. Eta hala ere, gauean,

ile urdintzen hasia orrazten dudanean korapiloak

askatzeko, bakardadeak baretuta, zure gorputz

lirainaren presioa sentitzen dut nirean; orduan, dena

etortzen da oroimenera: zure lehoi adatsa, irribarre

haren txinparta eta jasmin usaineko sasoi oso bat

iraun zuen pasioa. Baiki, zorte txarra ekarri nion

zure bizitzari; eman nizun eraztuna ere grina zen,

zure haragian haginka, eta haren topazio horia

hoztu eta ilundu egin zen tragediek bata bestearen

atzetik jo eta heriotza lekuko izan zenean, so,

gu masailak estu-estu geunden bitartean, isuri gabeko

malkoak distiraz begietan; sekula ez nintzen izan behar

bezain ankerra, edo, are, noblea. Orduan aukera

bakarra zegoen: zure orbitatik presaka ihes egitea,

zure maitasuna baztertzea eta zahartzea, eta isiltzea.

Atzeraka hegaldatzen zen ilea orain ez da mugitzen

iluntzean hondartza berean nabilenean, nahiz eta

haizea lehenago bezala altxatzen den itsasotik. Ikasi dut

zertarako diren ile orratzak eta gomazko xingolak…

Zure gorputzaren liraintasuna indarka sartzen da

birjina loan, eta alimaleko gose batek astintzen

dizkit lohadarrak ekaitz baten pare.