Altorentzat eresia

 

haizea aztarrika dezake adarrak orain eta uluka agurtu…

 

Arranoak bistatu daitezke orain:

Itzalak ortzi mugan,

 

hemen dira lapurrak bat-bateko urrats beltz eta tanke-gurpilak erauntsian.

 

berriro etorri dira arranoak,

Arrano jasa geure gainean

 

itzuli dira politikariak obus eta detonagailuen ezkutuko urrats handigaitzez

 

gugana jaitsi dira arranoak

Baionetak eta kanoiak

 

gugana jaitsi dira lapurrak gure algara, gure ostotsa ebasteko

 

aukeratu dute jokoa arranoek,

Eraman dituzte gure ohaideak

 

hemen dira politikariak generadoreen, morteroen burdinazko dantza honetan

 

bat-batean han dira arranoak,

Burdinazko egunsentiaren izar berriak;

 

Eman bide adarrari haizea aztarrika dezan eta uluka agurtu…

 

Oi Ama-Lurra, jaregin iezadazu, izan bedi hau nire azken testamentua, izan bedi hau

Ahariak ezpatari dion desira ezkutua ezpatak zorroari egiten dion otoitz gordea

 

itzuli dira lapurrak detonagailuen urrats beltz ezkutuez

 

sirena durundaz bete arratsaldeetatik harago, auto-ilaretatik harago;

Ahots, egun eta autobide zaratatsuetatik harago, gure aire disonanteen

Soraiotasunetik harago; gure begi-globo errezeletan zehar, gure leihate osteko loan,

Atzendutako geure ni-etara, geure irudi hautsietara; barrikadetatik harago

Aginduak eta ediktuak, burdinazko mahaietatik harago elefantearen egonarri

Gogoangarritik harago, profanatu ezin den bere brontzezko

Soin-enborretik harago, gainbehera datozen dorreetatik harago

 

usu zapaldutako zidorraren ondoko burdina xendatik harago

 

begi-kliska bakarreko ametsa, su gozoan etzanda leize batean,

Min hilgarriz zauritu txorien ondoan.

Lurra, jaregin iezadazu, emadazu etxekalte izateko bide, izan bedi hau

Ahariak uhalari egindako azken otoitza…

 

izar zahar bat abiatu da, hemen utzi gaitu, lehorrean

Zeru-behaka izar berri bat noiz hurbilduko;

Agertu da izar berria, badoala iragarri du

Betirako joan-etorria baino lehen…