OPUS DEI

Desira eta errukia. Bitxia da biek

ukitzeko era antzekoa piztea.

John Berger

Sexuari uko egin dioten mutilek

orain errugbiaren lege bihurrietara

moldatzen dituzte beren gorputzak.

Nire hirian da, harresien ondoan.

Inork ikusten ez duen lehia bat

ari dira jokatzen. Airearen aurka

entseatzen dituzte blokeoak,

eta soilik beren ihesaldiez

marrazten dituzte aurkariak.

Barreiatzen dira belardian eta

gotortzen dira berriz baloi inguruan.

Errepikapenak egingo ditu perfektu;

gaur baldarrak dira eta zoriontsuak.

Besarkatuta agurtzen dute elkar

hurrengo entrenamendura arte

atzerriko epela dakarten azentuez

eta elkarren azaletan errekonozitzen dute

sakrifizio isil eta bakartiago bat.