PLAGE OCEANE (I)

 

 

Mapan begiratu dut

ez naiz itzuliko

izena nahi nuen bakarrik

 

Plage Oceane

ez genion sekula izenez esan

ez zait gustatu

 

gurago nuen beste edozein

ez da aski izen hori

ez dagokio

ez da oroitu nahi dudana

 

orangina edo frigopie edo

eskoba edo bizikletako gurpiltxoak edo

patata entsalada edo peluxezko lehoia edo

 

gurea zen leku hori

Plage Oceane

postal bat

 

elkarren ondoan

ikusten zaituztet eta badakit

badakit han dela

badakit han ikusi zintuztedala

olatu handiegiekin jolas egin eta gero

besoak gerrian jarrita

 

harea eta ura

edozein hondartza izan zitekeen

 

elkarren ondoan ikusten zaituztet eta badakit

han izan ginela.