112

Paseoa Lea ondoan

Ihien kobrea uretan. Marea-errota. Karramarroak harri artean. Zubiaren begian antzinako ontziola, hareatza, San Nikolas uhartea, zerumuga. Azeri-buztana. Irlatxo bat ibaian lo, zuhaixka izen bakoz josita. Garzak zingiran. Pintada bat Leaz haraindiko horma batean: palestina askatu. Traineruak arraunean. Jauregi barrokoa, dorre sendokoteak, ontziralekua, sekuoia. Txalupen hilerria, adagio bat iraganarentzat. Eukaliptoen fruituak, iratxoen zibak. Enbor moztu bat (orbainak bihotz hustu baten taxua dauka). Teileria egon zen tokian, alanbrada. Ezkurrak. Landan, dozenaka kolorez, antzaretarako batelak ahuspez, saihetsetan aldarriak, saihetsetan herria. Behorrak eta moxalak. Baserri-auzoa, bidegurutzea, zubi txikiago bat, errepidea. Birigarroa masustondoan, masusta bakarra more, gainerakoak gorri. Erromesen ospitalea kaparrak janda, noiz eroriko. Orkatzen gorozkiak. Data bat gaztainondo batean labanaz idatzita. Aspaldi hartan maite nuen gizonak atzean utzi ninduen bihurgunea. Pikondo antzua. Txantxiku bat haitzartetxo batean. Nire oinatzak zidorrean. Gorostia sutan legez. Arratsaldea ixten. Pagausoa, hegada, negargura, bizi-arnasa.