110

Eguneroko bizimodua konplikatua da

Iratik eta aitak antz handia daukate.

Aita Gardena izateko, geneak utzi dizkio.

            “Harrapatuko duzue, ezta?

            Morgeko kiratsa ezin ahaztuta nago”.

Ez naiz bere lantua entzutera etorri,

galderak egitera baino.

            “Harreman ona, normala, ona.

            Baina eguneroko bizimodua…

            Konplikatua da”.

Yogientzat ere bai?

Uste nuen horretan gure gainetik zeudela.

            “Eki ikustera etortzen zen”.

Zerbaiten bila jaiki da, inspiratuta bezala.

Eta hemen dator, koadro bat ekarriz.

            “Berak egin zion hau, jaio zenean”.

Ekilore bat aurkian, errima bat ifrentzuan.

Etxeko artistaren zigilu landua.

            “Rob, kolunpioetara goaz”.

Neskak eta txikiak pa bota diote atetik.

Elur-putzu bat urtzear dirudi Robek.

            “Nire bi eguzkiak”.

Umezaina, beraz, ez da umezaina.

Ezer berririk ez eguzkipean.

            “Bigarren bizitza, bigarren aukera?”.

            “Hirugarrena, egia esanda”.

Iratik txit maite zituen

poesia eta botanika.

Eta bere aitak ezkontzak, antza.