Azken aitorpen bat

Zein mutil ederrek gozatu ninduen gehiago

nirekin etzan zirenen artean?

Erantzuna da neure arima eman nuela

eta lazeria jasan nuela maitatzean,

baina gaztetxo batekin gozamen handia

izan nuen gorputzez maitatu nuelarik.

Haren besoetatik ihes eginez barre egiten nuen

pentsatuz ezen berak grinaz irudikatzen zuela

nik berari arima ematen niola

gure gorputzak elkartzearekin soilik,

eta barre egiten nuen haren bular gainean pentsatuz

piztiek ere ematen diotela hainbeste elkarri.

Eman nuen beste emakume batzuek

arropa kendurik ematen duten hori,

baina arima hau, gorputz gabetua,

biluzitik biluzira doanean,

hantxe aurkituko du beste inork

ezagutzen ez duen zerbait.

Bere gisara emango du, bere gisara hartuko

eta bere kabuz jokatuko du,

eta, maitatzean lazeria jasan baleza ere,

hain lotura estuz elkartuta

ez dago egun argiko txoririk

gozamen hori deuseztatzera ausartuko denik.