Galtzea

 

Sara N.-M.-ri

 

Lorea elur artean

bezala, bat-batean,

odola, ttaka bat:

Galtzearen ikurrak

herioa ukatzen du.

 

                       * * *

 

Juntak eta lezeak zulatuz

Oraino tematsu, dragoi zaharra aurkitu nuen.

Maria-Antonia Salva

 

Horma idor honen juntak eta

lezeak zulatuz; ahanzturaren harritxorik

harritxoenetan; jasan duzun ez-memoria

itsuaren harkaitz artean, badakit zutaz.

Eta zutaz jakiteak lurra ematen dit, erroa.

Eta badakit eta badakit nitaz, zure

poemaren mirail fidelean, isiltasun

uherrezko harrian tematsuki urratua

—emazte sugea, emazte piztia, emazte dragoia,

kaktusa bezala, zu bezala, biziraule.

 

                       * * *

 

Renée Vivien-i

 

Bi emakume: desiraz

haratagoko itun bat,

alde guztietan eta

nehon ez idatzia.

 

Bi emakume: batera

sortzeko eta sortarazteko,

izenean eta haragian bizirik.

 

Itun bat: urrunago,

hemendik eta desiraz.

 

                       * * *

 

Hitzatea dakar

itsasoz

itsaso:

exilioaren exilio.

 

                       * * *

 

Dorrerik gorenaren

—hetsia eta uherra—

urguilutik

erortzen da

ordua

—eta hitza.

Bi tren bezala,

zurubia zabaltzean,

soako itsuaren

alderik alde

bat-batean epaitua.

 

                       * * *

 

Nire amari

 

           1

 

erraten didazu: hau da

nire gorputza,

nire odola.

Har, jan eta edazu

—bizitza eta hil mihisea.

 

Gero, ogi

xehatua, labanak

zauritua

eta mahaiko

oihala tatxatuz

isuri ardo gorria.

 

Hitzak

lapurtu zizkizun

jainko baten so

zantarraren pean.

 

 

           2

 

herioaren promesak

ukituriko

gorputzaren

zantar sakratua:

ezin ukituzkoa

jainko ausente baten

hatza edo

paria bat bezala.

 

Gorputz bizien

dohain apala

itzul iezaiozu eta

sakrilegio zakizkio.

 

 

           3

 

haragia, hitzen odola

zugandik

etortzen balitzaizkit bezala.

 

                       * * *

 

Ama

hiru bider

eta ehunez

ukatu zaitut.

Eta kanpoan  ez zegoen

Oilarrik kantari.

Gure traditze itsuak,

elkorrak, mutuak dira.

Eta deboila.