Poesia kaiera
Poesia kaiera
Maria Merce Marçal
itzulpena: Itxaro Borda
2014, poesia
64 orrialde
978-84-92468-53-9
Maria Merce Marçal
1952-1998
 
 

 

Udaburu

(1982)

 

Zure sexua eta nirea bi aho dira.

Senti ezazu nola dabiltzan ihintz-musuka goroldioan!

Nola ausikitzen duten zirimola biziekiko argi-ilunetan!

Nola mintzo diren zintzur irekizko sokorriekin!

Nola dantzatzen duten mihitxo askeek!

Pasaietako nolako sekretuak! Gure sexuak,

 

maitea, bi aho dira. Eta bi sexuek

ahoen ordez jotzen digute orain.

Beldurra gordez, goroldioaren dantza

Hezten duen bridaren oihartzunean urtuak,

alderik alde zabalik daukagu hondartza:

hagun biziaren desira dugu akuilatzen;

 

Zure sexua eta nire aho bizia,

aurtikiak, bi sexu bailiran txirikordatuak,

fruta zabalduen isuriak nahasten dituzte

eta eromen betean ahoak  dira bihurtzen.

Ahoak, orduak mentura hartzen eta brida

galtzen duen goroldio-urmaeleko koralak.

 

Orduak eta menturak brida gal gunean gaude,

zure sexua eta nire ahoa, goroldioaren

zirrikituetarik marea bizia zaldizkatuz, belarik gabe

lerratzen direnean: sexuak

aurpegiaren erdian eta hanka artean, ahoak.

Gatz irekietako oldartze da  oro.

 

Itsas gazteluek, festan, gau irekian

zeinuak ezabatzen dituzte eta brida laxatzen diete

zeharo ahoen eromenari. Edozein hosto lehor

berpizten da, sexuetan pindar beltza ematen

eta goroldio sumihiak karmintzen dituen

eguzkiaren argitasunarekin.

 

Goroldio jauzi batez erre dadila guztia

eta oratu bekigu gure sapa irekia!

Gure sexuek udaburua ospa bezate,

bridak oro euriz alda ditzala bihotzak!

Urtaro bizietan zartatu daitezela eguterak!

Milaka oihanetan loratu bitez ahoak!

 

Ahoek egin bezate goroldioak onar

Dezan gure sexuen miraila, bridarik gabe,

Bizirik, larru irekiaren antzera!