Poesia kaiera
Poesia kaiera
2001, poesia
64 orrialde
84-95511-24-X
Joxe Austin Arrieta
1949, Donostia
 
 

Argi mehe hau

 

Argi mehe hau

  daratulu xuria

      itsaspeko zokoen azterle

                linterna

                        behin-behineko

                        nagi eta eten

                                          korra

hondartzan jasoriko

xirula kamuts

      herdoildua

uhinen laztanetatik ere

          iraitzi eta

          lehorreratua zaren

          fetitxe absurdoa

Gorroto zaitut

        maitea

    zure erakarmen kixkalgarritik

    behin oratu zaituen

              eskua

    aldendu ezin badut ere

Gorroto zaitut

    eta egunen batetan

    leizazulorik sakonenera

          jaurtikiren zaitut

                  xorimalo mamutzar hori

    erroitzik larrienera

            amilduren zaitut

                        xaguzahar odoltsu hori

                        nota deslotuzko tresna arraroa

                        irudi ziztakorren iluntegia

                        altxorrez zamatua dirudizun

                                      hilobi-ontzia

                  goizaldeko tren ulukarien

                                        ahizpa zurbila

                      bidaztien oztopa harri

                      itsastarren zurrunbilo

                      jauregi lainoztatu

                      eihera alfer goroldiotsu

                      ardo-ozpinezko upel isil

                      abaro sukartsu

Gorroto zaitut

        zu

      argi mehe hau

      daratulu xuria

            zaitudan hori:

                  poesia maitea

 

w1982