15. agerraldia

 

 

(dolores preso komisaldegian. mozkin eta aguazila bisitan doazkio. Jakin gura dute zergatik ez duen automisofobiarik, zergatik amfak ez duen berarengan eraginik izan.)

 

aguazila: Arrastion, Dolores. Eroso zaude?

 

mozkin: Urte askotarako, Dolores.

 

dolores: Betiko, urte askotarako ez, betiko kartzela da ezarri didazuen zigorra.

 

aguazila: Ez zaitez harritu, terrorismo delitua egotzi dizute eta gainera hasbeko buruaren aurkako atentatua burutu duzu.

 

dolores: Ez dut galtzekorik.

 

mozkin: Bizitza bera ez zaizu nahikoa baliozkoa iruditzen?

 

dolores: Bestela ere bidearen amaiera bertan dut nik.

 

aguazila: Hain zuzen ere, eta galtzeko ezer ez duzunez, esaguzu: nongo ura edaten duzu, txorrotakoa edo botilakoa?

 

(Pentsakor dago dolores, ez du berehalakoan erantzuteko asmorik.)

 

mozkin: Badakizu zer den automisofobia?

 

dolores: Ez.

 

aguazila: Ez, zer? Ez dakizula zer den?

 

dolores: Ez dudala ditxosozko amf horren eraginik. Asko maite dut neure burua eta ez naiz zakar-poltsa nardagarri baten pareko sentitzen.

 

mozkin: Artekaleko zure auzokide gehienak hasi dira automisofobiaren lehen sintomak pairatzen.

 

dolores: Zuek amf hori bota aurretik ere, gehienek ez zuten euren burua maite.

 

mozkin: Hara, Dolores, denbora apur bat daramagu Artekaleko auzokideek edaten duten uretan amf dosiak botatzen. Gehiago zehaztearren, amfa beste inori baino lehen, zure semeari bota genion.

 

aguazila: Harengan bai, harengan eragina izan du, eta ez nolanahikoa, ezta, Dolores?

 

dolores: Gure semea beti izan da autoestima eskasekoa, bere aitaren berdin-berdina, zuek zerrikeria hori edanarazi aurretik ere.

 

mozkin: Hala izango da bai, baina amf dosia gehitzen badiogu, laster barru, bere burua balkoitik botatzeko agintzen badiogu, ez du zalantzarik izango.

 

dolores: Zer beharrizan duzue horretarako? Artekalekoek urteak daroatzate lozorroan, ez lukete protestarik egingo ezta zuek aginduta ere!

 

aguazila: Hori uste dugu geuk ere baina froga enpirikoak behar ditugu, erabateko bermea behar dugu, ez gara ezustekoen zale.

 

mozkin: Eta zu anomalia bat zara, aurreikusi gabeko ezbehar bat. Eta nork maite ditu ezbeharrak?

 

aguazila: amfak zugan eraginik zergatik ez duen jakin behar dugu.

 

dolores: Azken hatsa etzi bota lezakeen atso zaharra baino ez naiz. Bizirik zabaldu gura nauzue?

 

mozkin: Zu zabaltzen ez bazaitugu, Nahikari zabaldu beharko dugu, zurekin ihes egin badu, amfak harengan ere eraginik ez duela esan nahiko baitu.