nahiko zenuke

horma sendo eta leiho-ertz zabaleko

etxe zahar batean bizi

iluntzetan belaunak besarkatuta

eseri ahal izateko

laster ohituko zinateke

etxeko

mamu amultsuetara

eta ilargi argitan

melodia ahazturen bat adituko zenuke

batzuetan kamisoi luzedun

ume ezezagunen bat agertuko zen ortozik

eta zure altzoan hartzeko eskatuko lizuke

eskailerak, norbait gora-behera eta eztulka balebil bezala

egingo luke kirrinka

aspaldi usteldu ziren

aulkietako bizkarraldeak brodatu zituzten

esku haiek

marguldu egin ziren koloreak

zenbat bero

eta txera marrazki haietan

zeu ere

mamu bat izango zara

etxe zaharrean egunen batean