LAS CORTES

Prostitutak eta jonkiak,

eta prostitutak diren jonkiak,

eta jonkiak diren prostitutak,

giza miseria

giza miseriari

diru trukean

Las Cortes kalean.

¡Ven aquí, guapo!

diost euretako batek,

kotxe baten aurrealdean jesarrita dagoela.

¡Ven aquí, cariño!

eta irribarre egiten du,

bere gorputz lodi eta zaharra erakusten didala,

eta badirudi

upel itxurako bere tripa koipetsua

lehertu egin behar zaiola,

lehertu egin behar duela

ezin estuago daroan minigona merkeak.

Momentu batez

kalearen amaiera aldera begiratu du.

Ez dakit han ikusi ote duen

honen guztiaren irteera,

amets egiten duen ihesa,

edo Cantalojasko zubitik,

trenbidearen gainean,

handik behera salto egiteko aukera.

Niregana zuzendu du berriro begirada

eta irribarre behartu batekin batera

zera diost:

¡Ven aquí, cariño!