Beste ezeren gainetik nik idazlea

eta maitalea izan nahi nuen.

Esan gabe doa Che Guevara

ere izan nahi nuela baina

hori beste nonbaiten dut gordea.

 

Ez idazle-maitalea

era bukowskiar antzeko batean,

hankarteko poeta gizonttorik ez.

Nik maitatzen jakin nahi nuen

eta nuen nahi jakin idazten nik,

jendeak ni irakurri

ondorenean (bilatuta ala zoriz) gehiago

irakurtzeko gogoa izatea.

Idazlea ez da idazten duena — besteek

irakurtzen eta irakurri nahi

dutena baizik.

 

Eta ez nuen asko askotan askorekin maitatu

gura — maitalea ez da egiten duena — besteengan

maitasun fruitu osoak utzi

dituena baino, maitasun arbola lerden

eta joriak, ez papurrak.

 

Lanean jarraitzen dut.

Basozain traketsa naiz.